2018-09-20, 03:25 PM
![[Image: 1537434741_6bf4.jpg]](https://static.appledaily.hk/images/e-paper/20180920/large/1537434741_6bf4.jpg)
陳安立(Brian)同潘杰寧主持嘅《世界盃稀客》之前靜悄悄咁推出，但無論欣賞指數或認知率（即評分人數／收看電視總人數）都十分高。
陳安立(Brian)同潘杰寧主持嘅《世界盃稀客》喺港台最新公佈嘅2018年「電視節目欣賞指數」第二階段調查結果，
喺極少宣傳嘅情況下，竟然力壓無綫排名第三，欣賞指數達73.97，成績非常理想！ Brian今日接受《蘋果》訪問，
佢話收到呢個消息之後，當然覺得好開心：「呢個監製好厲害，佢之前拍啲節目都有上過榜，好似之前拍嘅《前前線》，
可能啲人鍾意睇啲冷門嘅地方，而呢個數字唔係講實際收視。講真收視有幾多，其實大家心中有數，反而係口碑贏，
好似啲獨立電影，俾多啲人知道都好。」 講到宣傳似乎唔係有太多，Brian就話：「呢個節目本來喺世界盃之前播，
等啲觀眾可以了解多啲新入圍嘅國家，不過之後擺咗喺世界盃期間播，嗰陣啲宣傳主要集中喺賽事，喺節目方面相對咪少啲，
可能係誤打誤撞，有幾集係喺最高收視嘅比賽後播，所以咪多人留意。」 Brian仲話：「其實我哋拍嗰陣真係幾過癮，
有啲體驗好特別，真係要拍嘢先可以接觸到，可能係觀眾睇電視嘅習慣唔同咗，那怕出街嗰陣唔係咁多宣傳，o依家都有人講番，
呢樣係最開心。」
不過佢話有一個人一定要多謝：「呢個係我阿媽，只要有我嘅節目，佢一定會send晒俾佢啲朋友叫大家睇，
最搞笑係呢個節目第一集去冰島，我阿媽睇完之後，o依家同啲朋友去咗冰島玩，仲要自駕遊！」
至於會唔會想繼續挑戰呢類節目，Brain話：「唔知呀，等公司安排，我o依家拍緊拍劇，但係我自己梗係想，
就算去啲騎呢啲，艱苦啲嘅地方都冇問題。」