HKGAY 同志資訊平台

由日本男星田中圭夥拍吉田鋼太郎嘅BL神劇《大叔的愛》添食開拍成連續劇，昨晚起逢周六晚於當地播出，好戲大叔吉田鋼太郎繼續扮演擁有少女心嘅55歲同志上司，暗戀田中圭扮演嘅直男主角，而新版就由林遣都飾演其同事兼室友，發展HEHE味濃郁嘅職場三角關係。

2016年版嘅《大叔的愛》特備劇播出後引起頗大迴響，今次新版又會有田中圭被熊抱、壁咚及親嘴等場面，而昨晚首集劇情發展迅速，田中圭已得知上司傾慕之情，更發現被對方偷拍大量照片。不過都唔及林遣都衝入浴室一幕精彩，佢向剝光豬嘅前輩表白，並講：「我知你鍾意巨乳，但難度巨X就不行嗎？」對白夠晒大膽露骨，之後更主動狼吻田中圭，劇集出街後不少網民於社交網洗版式討論，令《大叔的愛》一度登上最多tweet文嘅冠軍。同時，劇組為全力造勢，唔止多處有大廈電梯及列車門都出現兩位主角嘅啜啜自動門，昨晚又在Instagram公開田中圭浸溫泉玩到甩毛巾嘅短片，透過互聯網成功造勢。