【信徒的自白】我是牧師兒子 也是同志

[jungkook]

採訪之前，Tim已開宗明義不能上鏡，原因不為自己，只為家人，「我唔想為屋企人帶嚟麻煩，畢竟我父親係牧師，位高權重，我唔想拖累佢。」而他正正是一位信奉基督教，同時出櫃的男同志。「直至而家我都相信，我落梗地獄，不過我都接受。」今日的他能夠豪言一句，但背後卻是花了大半生，才慢慢領略出來。青春期時，男生們之間開始討論性的話題，「男仔都不外乎係色情網站搵片睇，最初會先找男女，但我從來唔望女主角，反而望男人同佢哋嘅私處，覺得他好吸引。」

坦白出櫃　父母理解但永不接受
中學時，與男友分手後大受打擊，傷心欲絕的他選擇和教會的朋友傾訴，殊不知同志的身份很快便傳到教會高層耳中，「班朋友好震驚，唔識處理，於是向佢哋講咗我係同志。」同時，他父母的朋友亦偶爾撞到他與男生逛街，種種機緣巧合下便被公開出櫃。本身他於崇拜裏負責彈琴，後來便立即被終止。性取向即使身不由己，但被定義為罪，與殺人等罪行變成同等。當他父親得知後，先邀約他外出吃飯，「佢不斷問我點解，我由細到大未見過佢喊，但當時佢都『兩泡眼淚』，甚至問我係咪因為佢長期唔係我身邊，所以先會喜歡男人。」

然而，最令他大受打擊的，不是被朋友出賣、也非教會的漠視，而是來自至親的反應。「佢當時講咗一句好令我深刻，『我理解，我明白，但我永遠不能接受你。』我接受不到為何你不支持我，因為你係我阿爸阿媽。」出櫃後，他有很長的時間看到父親在家中祈禱時，俯伏在地大哭的景象，令他很崩潰，「忍唔住問神點解要造我出嚟，點解我要喺呢個家庭長大，但又要我和家人承受這些負擔？神你係咪玩X我？」對着家人，他深知他們不能接受這樣的兒子，自此選擇沉默一言不發，不再提起同志一事。升上大專後，就逃離家庭，亦開始以返學、兼職等理由不返教會。實際上，他透過各類交友App與不同男人上床約會。「返教會就俾人輔導，永遠離不開『你諗清楚未』、搬出 『神造男造女』 嘅經文，好無癮。嗰陣態度係同全世界、同神鬥氣，大家覺得我衰咪衰到底。」他自言，有數年時間專程去買醉和蒲，他形容自己為癮君子，不斷以「吸毒」來麻醉自己，減輕痛苦。偏偏這段時間，他彷佛會聽到內心有把聲音，「『阿Tim你唔好再咁落去』，好得人驚，可能有人覺得只是良心發現，但我會覺得係神同我有交流。突然有日『叮』一聲，諗到其實自己仲有得揀。」

Tim坦言在黑暗時期過後，反省自己，於是他撇下過往，嘗試認真發展戀愛關係。他與現任男友拍拖數年，對方是信奉佛教，但無礙他用心建立一段感情關係，「我相信存在愛嘅時候，二人就能找到尊重大家的中間點。例如我哋好鍾意旅行，佢好鍾意參觀廟，我會陪他入廟但唔上香，大家和而不同。」慢慢地，他開始明白何為尊重，更懂得了何謂愛。Tim由起初的火爆性格，到今日溫文有禮，除了成長，戀愛不多不少也是帶來轉變的關鍵。也許眼見兒子的轉變，父母的態度亦開始軟化，尤其媽媽。「阿媽相對無咁強硬，亦關心我嘅生活，例如男友住元朗，我話入元朗佢就會知我去拍拖同過夜，最多提我小心啲，唔好蝕底晒俾『朋友』哈哈。」
雖然母親持開放的態度，但和父親話題也只能是點到即止，問他可會繼續信仰，他毫不猶豫回答「會」，但目前尚未找到一間合適教會，也思索如何面對規條，「我好清楚知道佢係我嘅神，佢就係空氣般的存在。但無可否認，如果用基督教的規條或所謂標準量度，我只會係一個壞人同罪人。」於規條與情感之間，他堅決選擇後者，因為於他而言，承認同志身份，才是真實又赤裸地面對上帝。「我就係我，所以直至而家我都相信，我落硬地獄，不過我都會接受。」

採訪：鍾藹寧
攝影：潘志恆、林正言




即使身為同志，未必會被全部教友接納，但Tim仍堅持相信他所選擇的信仰。


Tim選擇不上鏡的原因，是希望保護家人，尤其是身為牧師的父親。


Tim曾經於團契侍奉，後因被揭發是同志而被終止。