生活圈子

[維卡諾思]

新一年就到，意味著我又大一歲。唔知係咪單身太耐，開始覺得個人太摺、同個圈子太脫節係唔得。拍拖講緣份、可遇不可求，但都想有班圈內朋友傾下計、講下圈內事。
喺TT出過唔少Post，手機裝咗6個交友App，有好乖咁跟足規矩放相㗎。不過可能我太醜，一路都無乜人理。然後，又入過唔少Line Group，但太多人，比較難融入。
虛擬世界唔順利，不如喺現實世界搵。試過各去過一次桑拿同酒吧，算係鼓起勁大勇氣，一個人大鄉里出省咁走上去。不過，最後係自己傻更更呆咗5、6個鐘，從此就無信心再去。又試過去非牟利機構嘅同志聚會、活動，不過成件事感覺好尷尬，又好似參加緊啲中學生教育工作坊咁。
本身做傳統行業，所以較難將感情事同工作環境拉上關係。我自問，喺讀書、做嘢，我都知道方向，有路可行、一直進步。但圈內事、感情事就好迷惘。有時候，真係好怕我40、50歲，仲要喺TT開Post，話畀全世界知我孤獨。
喺度問依個問題，肯定會被人插吧？只係，既然下定決心想改變，唯有向各位惡補下交友技巧。