當我們開始長大

[Banhallen]

成家立室......?


我和你坐在泳池旁高桌前，高度阻隔了鬧市的嘈雜和喧鬧，這裏比地面少了兩分繁華，多了三分空間。

高處望去另一邊的馬場烏燈黑火，更顯這片後花園的寧靜。
侍應放下炸薯條和兩杯飲品後，你突然殺出一句，「我想結婚生仔。」

我喝下兩口Gin and Tonic，毫不驚訝地回應「想要小朋友？」
「係呀都差唔多啦，同埋想早啲結婚，到頭髮白曬先去個仔嘅大學畢業禮好似好7」
「小朋友我真係搞唔掂，宜家啲小朋友好曳，有時行過見到真係想打佢兩巴」
「但佢地真係好可愛」你臉上掛着一個慈父的笑容。
「你有冇湊過仔呀？佢地真係好邪惡好曳」
「大學果陣有叫做湊過下家姐個仔」
「湊定玩下人地個仔先，爭好遠架喎」
「半玩半湊啦」
「咁唔同啦，但做乜冇啦啦諗埋啲咁長遠嘅事？」
「差唔多啦，我都廿中啦喎，結得婚再生埋都三十可能」
「不過話說早幾個月真係收到人生第一份請帖」
「咁後生？」你有點驚訝。
「女仔黎嘅，本身都大我幾年，廿五 六度啦」
「哦咁都正常啲，我都收到帖，但仲要做兄弟」
「咁快嘅，中同黎架？」
「係呀，好似拍左好耐拖」
「你知唔知做兄弟最緊要係咩？係有車呀」我邪惡地笑着說。「你架model交叉係時候拎返出黎揸啦」
「屌講呢啲」你也不禁失笑，「不過佢真係有講過點解揾我做兄弟」
「你唔夠靚仔唔會搶風頭？」
「屌，佢真係話唔揾以前校隊啲人係怕佢地太型」
「你係綠葉呀」我再加以恥笑。「咁你有目標未呀結婚？」我追問。
「未呀，近排事業為重」
「屌，你講曬啦，又話要結婚，又話要事業為重」
「冇錢邊有女要呀師父」
「曾經都有拔萃仔要你啦，證明冇錢都得，唔使咁灰喎」
「你真係好中意講佢，果陣人地係中學生，點同？」
「你地宜家仲有冇contact?」
「有望下佢ig囉不過冇講野啦，佢宜家都有女啦」
「有女架？」我很驚訝地問。
「係呀有時候有合照」
「嘩咁你真係⋯⋯」我也不太懂得該如何說。「即係佢係直男黎架？」
「其實我都唔知，可能嗰陣不確定呱⋯⋯依家點問喎大佬」
「咁你地果陣真係自修室識？」
「係呀，我果陣year 1佢form 6」
「好心你啦咁大個人仲同人地爭自修室，你去又唔係去讀書，淨係溝仔」
「真係温書囉好唔好，係咁啱佢問我借野先識到，所以係佢主動」
「借咩呀？貞操呀？」
「屌」你沒好氣地笑了，「我都唔係好記得，好似係塗改帶」
「冇帶咪用手劃左佢囉，擺到明借啲兒溝你」
「一開頭好正經架炸，佢都想入Poly呀嘛，咪問下我讀緊果科啲野」
「之後呢？」
「其實依家諗返起，都唔會覺得嗰陣好似拍拖咁」你想了想，接下去「有啲似好朋友咁，不過係會有啲親密行為」
「但之後你地點解會散嘅？」我還是最關心結果的人。
「佢考完dse就過左英國」我聽到你說之後，心中明白了七成。「我諗係佢諗清楚自己要咩？或者佢個世界唔同咗？佢過咗去之後冇再點去聯絡，之後大家慢慢就冇再搵大家」你說得倒也輕鬆。
「有冇樣望下先？」我好奇地問。
「冇啊」你斬釘截鐵地回答。
「圖炸喎⋯⋯我唔會搵佢架」
「唔啦都咁耐之前」
「佢又玩運動嘅？」
「有啊，係校隊添⋯⋯」
「玩咩架？游水定水球」我雙眼發亮，腦裏充滿着幻想。
「佢打波㗎」
「頂點解直仔咁正」我的口水也快要流出來「打咩波架？快啲講啦」
「唉唔係籃球就足球㗎啦」
「兩種都好正喎，你就好啦咁正嘅都食過，仲要宜家想食返都冇」
「羨慕呀？」
「好葡萄呀好想拖佢入房埋牙肉搏」我流露出貪婪的表情。
「咁你呢？會唔會結婚？」你問。
「啱啱拍拖炸喎師兄」
「我single都諗呢啲啦，冇話太早嘅」
「不過有時都幾羨慕你呢啲bi仔，可以行返最普通嘅路，拍拖結婚買樓生仔，然後再望住仔女長大，我諗會係幾幸福嘅事」
「如果我揀女仔就係囉⋯⋯」你回應。
「但睇你個feel都係女架啦⋯⋯？」
「應該係⋯⋯」
「我好似冇左好多人生同家庭嘅固有觀念，有時都唔知係好事定壞事」
「自由自在，做乜都得喎」
「你睇我好，我睇你好啦或者」

我再喝一口冰涼的Gin and Tonic，完結了沒有結論的對話。

[Hobbit Liu]

繼續支持港故！！！！

[hd9254]

夠精彩，如果有續集一定繼續追