深圳 Onana Club 遊記

[Lets_doit]

深圳 Onana Club 遊記



5月19日星期六，同朋友上咗轉深圳玩，最主要原因係去Onana Club 睇日本Gogoboy Alex + Susumu + Kay。先講講呢間Onana Club，位於哋鐵大劇院站京基100商場後面，交通十分方便，上去飲嘢之前可以去商場食埋飯先。如果要知道更多Onana Club 的資料，試下去微信search佢哋個公眾號(WeChat ID: Party-MY)，佢哋嘅最新活動都有在公眾號公布。好，入正題。

當日我由深圳帥哥朋友帶住，入場時佢同職員打聲招呼，就入咗去卡座坐低。到場時人流開始多，音樂十分強勁，吹水聊天有些少難度，不過飲酒抽水就完全無問題。睇到呢度，你可能想問究竟Onana Club 收費如何。以呢個周末為例，5月18日(星期五)入場費係50蚊人仔，5月19日(星期六)入場費係100蚊人仔。星期五訂檯收費我無特別問，但星期六呢，高台(即係好似cocktail party的高檯，有幾張高椅)最低消費係880蚊人仔，免5位入場費。

卡座(即係好似卡位咁，不過U字型，你想像下好似K房咁，梳化前面有茶几) 最低消費係1680蚊人仔，免8位入場費。官方微信公眾號話訂檯只保留到當晚10點，不過深圳帥哥朋友係常客，一早幫我哋訂好晒檯，我哋11點左右去到，依然無問題，所以真係出外靠朋友呀。我哋一坐低，有服務員就過來落單，目的當然係確保我哋有點夠1680蚊啦，帥哥朋友幫我哋叫咗幾打啤酒慢慢飲，8個人分，其實都係每人兩百幾蚊，坐得舒服自成一角，都幾OK架。

不過呢，又好老實咁講，只有一個卡座係近表演台，其他卡座都離表演台最遠，所以如果真係好多人一齊去，唔使訂晒卡座，如果想有得舒舒服服坐下，又想易睇表演，不妨訂一個卡座一個高台，再唔係，只訂一個卡座其他就咁俾入場費，因為服務員唔會理卡座坐咗幾多個人，加上一定有人出咗去睇show跳舞吹水或抽人水，唔值得訂超過一個卡座。

如果唔介意要企下又坐下，近表演台嘅高台就更加合適喇！一路坐下跳下到12點左右，三個gogoboy 就第一次出場了，之後每隔大概一小時就會再出場，一共三次。第三次(即最後一次)出場時，佢哋會著泳褲帶毛巾出來，然後圍住毛巾除泳褲，再將毛巾開開合合咁引人。

如果你想同gogoboy親密一下，當然要預備好你個咀啦，用咀夾住張100蚊紙，向佢揮手，佢會過來咀返你 (同埋拎埋張銀紙)，用開手機支付嘅bro 要記得帶定現金，因為佢哋身上無QR code，無得用手機掃佢個身付款。睇完最後一次出場，已經凌晨兩點幾。現場仍超多人，不過我就同朋友閃先喇，但我地亦知道有唔少香港過來嘅朋友已經訂咗一晚酒店過夜。

如果唔想訂酒店又唔想咁夜返香港，去按摩都係唔錯嘅選擇，正骨HEHE按摩都好易搵，梗有一間喺左近。如果真係好似我哋咁決定返香港，由Onana Club 門外搭的士去皇崗口岸，約10分鐘車程，車費35蚊人仔左右。住九龍嘅兄弟出咗大陸關，右邊就有直通車大巴去市區各處，左邊就有黃巴士(正名為落馬洲-皇崗穿梭巴士，車費10蚊，呢個係港幣，離開咗大陸，返到香港用八達通喇)。

搭一程車(直通車大巴／黃巴士)去到香港關口，落車過關，完成入境香港手續後，本身坐直通車嘅就上番架直通車，其他兄弟如果去新界西可以轉搭綠色小巴，去新界東就行到最前搭多程黃巴士 (車費已包)去落馬洲(新田)公共運輸交匯處轉紅van或九巴N車(半小時就有一班)，的士亦可以在呢度搭。

感想：
1. 深圳男仔好多都好高大靚仔，唔知點解平時去深圳用Blued又見唔到呢啲高質仔仔。
2. 深圳的啤酒無乜味，飲完都無乜感覺唔會醉。
3. 場內冷氣不足，可考慮著背心短褲，甚至唔著上衫，但褲要著，我見到在場有極少量女仔。
4. 場內不禁煙，要特別注意，我件衫返到屋企吸晒煙味。
5. 上深圳好方便，半夜經皇崗回港都比想像中方便。