慢必失戀 貓變單親

[Dougal]

人民力量陳志全（圖）噚日出席動物權益集會遊行，佢以個人經歷寄 . . . . . . （馮凱鍵攝）

【明報專訊】多個關注動物團體噚日舉行遊行集會，呼籲政府加強保障動物權益。本身養咗兩隻貓嘅人民力量陳志全（慢必）都有參與，佢喺集會上分享領養動物經驗，透露兩隻貓係自己同前男友拍拖時領養，後來佢同男友分咗手，兩隻貓就變咗「單親貓」，由自己繼續養。慢必形容領養係「終身承諾」，寄語情侶唔好「情到濃時」就隨便領養，即使分咗手都唔好棄養。

慢必話同前男友以前住西貢時，見到一對待領養嘅雄貓，本身諗住只養一隻，但經前男友游說，就領養晒兩隻。

籲情侶情到濃時

唔好隨便領養

佢話同前男友領養兩隻貓後，唔夠一年就分開咗，兩貓就喺「單親家庭」長大，?家已經8歲。慢必形容，領養係終身承諾，好多人會用動物作為情侶間禮物，但當分手時為免觸景生情就棄養，佢強調動物係無辜，情侶既然領養得就要負責任。

噚日集會有唔少市民帶埋動物出席，社民連常委陳皓桓就帶埋柴犬遊行，佢喺facebook形容自己隻柴犬「一向作風扮乖」，成功令好多人請佢食嘢同搵佢影相，好似明星咁。

民主派會議召集人毛孟靜噚日亦有現身，表現得好雀躍，不時同現場動物開心合照。