【HK Express男體盛】男體盛物化男性？

[太陽的後裔]

香港快運官方 Facebook 上星期五（12號）出咗個宣傳 post，有得贏機票，engagement 似乎相當好——目測近期佢哋出嘅 post 冇一個有咁多 engagement。不過反應當然分好多種，今次宣傳咁好反應，唔多唔少因為好多港男走去鬧。

鬧乜？要贏機票就要睇片答問題。條片疑似係「男體盛」（佢哋宣傳都話係「人體盛」），估下片中赤裸男模身上壽司總重量有幾多。隨片附送兩位疑似港女嘅飢渴食相，配合「有食唔食罪大惡嘅」嘅主題。相信讀者都知咩係「女體盛」，咁「男體盛」都係同一回事。係，男女平等嘛，所以咪平等地會畀人鬧咯。

女體盛呢樣嘢，你鍾唔鍾意都好，明顯係偏離現今普世社會價值，基本上搞親都畀人鬧。鬧乜？當然唔係好唔好食衞唔衞生，反正去食嘅應該唔會介意，鬧嘅十居其九係女權份子。舊年 10 月香港先有間餐廳想搞「女體盛」表演，結果當然畀女權份子鬧爆，話貶低女性物化女性性別歧視等等品味低等等（我好奇怪，原來「品味低」都有得投訴）。

餐廳後來澄清大家「誤會」，模特兒會着比堅尼，而且食物只係擺設，唔會有得食落肚。吾友就話「咁仲衰！更加要鬧！」本城唔識尊重日本人傳統？日本仲有冇女體盛我唔知，相信係有的，但我冇見過。肯定嘅係搞嘅都要偷偷地，之前有幾單報咗出嚟，一係畀人鬧到要取消，一係畀人拉。

咁如果女體盛係物化女性，何解男體盛唔係物化男性呢？點講都唔通。

不過事實係，我睇 Facebook 留言，女嘅，絶大多數係「正常留言」，即係估壽司幾重，冇人出嚟話「物化男性」，更冇人鬧爆話要杯葛。

男嘅呢？就出嚟鬧物化男性，都好多人讚好（主要都係男人自己圍爐），相映成趣。

利申：本人上個月先坐過香港快運，亦絶對唔介意再坐（最緊要夠平）。本人絶無意批評香港快運點傷害港男感情，更冇打算講咩「關公災難」。首先，呢個詞比「KOL」更濫。第二，反正港男夠大量，唔會搞咩杯葛，夠平嘅下次大家又搶過。第三，其實快運都大把「災難」，多一單唔多啦，最緊要之後你照坐。

而我亦好相信，鬧嘅男性，其實真係冇幾多個覺得好冒犯或好介意。佢哋嘅不滿，明顯係嚟自女權份子嘅雙重標準。平時乜都鬧物化女性乜都話歧視，同樣情況主角換轉係男人就梗冇問題。呢種伸縮良心尺，先最令人憤怒。

事實上，古語有云，雙重標準先係唯一普世標準。女權份子兩把尺，大把例子。女性雜誌 Cosmopolitan，曾經出過文講《Confirmed: Men who objectify women are effing horrible》，物化女性嘅男人好 X 恐怖，肯定係。但另一方面，奧運會前，佢又出文講《36 Summer Olympic bulges that deserve gold》，研究各國男運動員褲下突出的小鳥。你可以想像一份普通男人雜誌品評「奧運 36 對金牌好波」而唔畀人鬧爆嗎？更不用講 Cosmopolitan 係自打嘴巴，我估男人雜誌唔會出文講「物化男性嘅女人好X恐怖」。

另一例子？當然係主流，女性參加嘅選美（以下簡稱「選美」）。眾所周知，選美係女權份子睇唔順眼嘅重災區，特別係泳裝環節，以及報佳麗嘅三圍。似乎有人認為選美應該測 IQ，應該問下佳麗對博科聖地有乜睇法，或者認為哥德巴赫猜想（Goldbach's conjecture）係咪真的。但重點不在此，重點係，不如睇埋港男選舉？

如果話選美係侮辱女性，咁我諗港男選舉直頭係赤裸凌遲男性。有冇咁誇？請留意下，港男選舉往往只係得女人做評判，早幾屆甚至只係得女觀眾，甚至司儀都只得女人。換着選美得成班男人？女權份子又唔高興了。港男選舉仲有濕身環節，女評判仲要尖叫甚至摸下參賽者，港男仲會表演震波之類，你估下選美可唔可以咁？叫乜乜 BB 着三點式泳衣出嚟濕身，然後在乜乜總理面前跳幾下再摸下，聽日就鏟平你個電視台呀。但我從冇聽過女權份子話港男選舉物化男性，唏放鬆啲啦，不過一個 show 之嘛，咁都咁大反應你係咪男人嚟？此乃雙重標準。

但，正如上面所講，其實港男一般好大量。我認識嘅港男其實冇乜邊個覺得港男選舉侮辱男性，正如佢哋亦唔覺得選美侮辱女性。之所以咁多人出嚟嘈，係因為女權份子嘅雙重標準。

關於女權份子／女性主義（兩者當然唔係完全一樣）的雙重標準，要講就可以寫幾十篇文。

但我聽過最貼地嘅評論，係出自一位女性朋友。佢話女性主義就好似原教旨共產主義咁——年少接觸時真係覺得好偉大，因為係萬能嘅，一切嘅錯都係嚟自男人／資本家嘅剝削。但到出嚟社會打滾咁大，四十歲人，仲真心信呢啲嘢？

有人話 I don't hate god, I hate his fan club，我諗好多港男都會諗「女性主義我都仲接受到，但某啲信徒真係好惡頂」。

  

  

[落霞秋水]

哇 樓主意見真精闢 一針見血

[CallMEMaybe]

Actually, I quite enjoy that if I could be the plate.

[gary]

唔知幾時到香港有呢

[drunkbb]

直接食男人啦

[Ss05107657]

Bad taste for the marketing staff

[一人飲酒醉]

So attractive to me

[network]

其實我覺得蠻噁心的

[愛的供應]

香港有男體盛？

[瓦爾特]

正 我想試下